COVID-19 cases sa bansa pumanik ng 2,067, nahawaan lagpas 580,000 na

MANILA, Philippines — Nakapagtala ng nasa 2,067 bagong kaso ng coronavirus disease (COVID-19) ngayong Martes ang Department of Health (DOH), bagay na nag-aakyat ng kabuuang bilang ng nahawaan sa Pilipinas sa 580,442.

Patuloy naman ang paglobo ng mga "active cases," o mga nagpapagaling pa sa karamdaman sa pagtalon nito sa 33,610 — mas marami uli kumpara sa datos noong Lunes.

Binawian naman ng buhay ang karagdagang 47 pasyente dahil sa COVID-19 kung kaya't 12,369 na sumatutal ang mga domestic deaths dahil sa virus. Umabot na sa 534,463 ang mga ligtas na sa panganib simula nang mag-recover mula sa nakamamatay na sakit.

Anong bago ngayong araw?

• Kanina lang nang kumpirmahin ng DOH na anim na kaso ng mas nakahahawang COVID-19 variant na unang nadiskubre sa South Africa ang nakapasok ng Pilipinas. Pag-amin ni Health Undersecretary Maria Rosario Vergeire, may pattern sa mutation nito na maaaring magpababa sa pagtalab ng mga COVID-19 vaccines.
• Pag-uusapan pa naman sa ngayon kung magpapatupad ng mga bagong travel restrictions sa Pilipinas kasunod ng pagpasok ng South African COVID-19 variant. Sa kabila niyan, hindi raw maaaring magpataw ng bagong paghihigpit sa bawat dagok, ayon kay Vergeire. 
• Samantala, kinumpirma naman kanina ng Food and Drug Administration (FDA) na pormal nang nag-apply para sa emergency use authorization (EUA) ng COVID-19 vaccine ang Chinese drug maker na Sinopharm. Matatandaang bakuna ng Sinopharm ang gustong maiturok ni Pangulong Rodrigo Duterte sa sarili.
• Umabot naman sa 13 katao ang nakitaan ng "side effects" ng bakunang CoronaVac ng manufacturer na Sinovac matapos simulan ng Pilipinas ang immunization efforts nito laban sa COVID-19 kahapon. Ang naturang datos ay ngayon lang isiniwalat ng DOH.
• Kinumpirma naman ni presidential spokesperson Harry Roque kanina na ibinasura ng National Immunization Technical Advisory Group (NITAG) ang naunang proposal na bigyan ng COVID-19 vaccine agad-agad ang 50 "influencers" para mapataas ang tiwala ng publiko sa Sinovac at immunization. Aniya, naninindigan ang NITAG sa prioritization ng ilang sektor sa pagbabakuna sa ngayon.
• Umaabot na sa 113.82 milyon ang tinatamaan ng COVID-19 sa buong mundo, ayon sa huling ulat ng WHO. Sa bilang na 'yan, 2.52 milyon na ang tigok. 

— James Relativo at may mga ulat mula kay Xave Gregorio