Duterte 'di pa rin tiyak kung dadalo sa 2021 People Power commemoration

MANILA, Philippines — Isang araw bago gunitain ang pagpapatalsik sa diktador na si dating Pangulong Ferdinand Marcos noong 1986, wala pa ring balita kung pisikal na dadalo si Pangulong Rodrigo Duterte sa magaganap na anibersaryo ng EDSA People Power uprising sa Huwebes.

Ito ang ibinahagi ni presidential spokesperson Harry Roque sa isang press briefing ngayong Miyerkules matapos matanong ng mga reporter.

"Meron naman pong magiging statement ang ating presidente sa EDSA dahil 'yan naman po was made into a public holiday," ani Roque.

"I have not been informed of any participation [tomorrow] as of yet, so I do not know this information. But I can assure you there will be a statement."

Kung nagkataon, ito na ang ikaapat na EDSA commemoration na maiitsapwera ni Digong simula nang maluklok bilang presidente noong Hunyo 2016: "Antayin na lang po natin ang official statement po ng ating presidente," dagdag pa ni Roque kanina.

Nakalista bilang special non-working holiday ang ika-25 ng Pebrero taun-taon bilang pagsariwa na rin sa pag-aaklas ng mga Pilipino sa pagpapatalsik kay Macoy sa Malacañang.

Ayon sa Amnesty International, umabot sa 70,000 katao ang naipakulong sa ilalim ng Martial Law ni Marcos — maliban pa sa 34,000 na tinorture at 3,200 pinatay.

Matatandaang nagdeklara rin ng martial law si Duterte sa Mindanao, bagay na tumagal mula Mayo 2017 hanggang Disyembre 2019.

Bagama't kilala sa nakaw na yaman at human rights violations si Marcos, matatandaang in-endorso ni Duterte ang kandidatura ni Sen. Imee Marcos noong 2019 — isa sa mga anak ng diktador.

Basahin: Duterte says no proof Marcoses amassed ill-gotten wealth despite overwhelming evidence

Kaugnay na babasahin: Did Marcos oversee a period of peace and order?: ERA OF IMPUNITY

'Diwa ng EDSA dapat pahalagahan'

Bago ang mga selebrasyon, nanawagan naman ang ilang personalidad na isabuhay pa rin ang diwa ng pagkakaisa na itinuro aniya ng EDSA sa mga Pilipino.

"I think the People Power Revolution really demonstrates the power of unity, the power of shared values, the power of solidarity... And we can also aspire for the same values on our own world today," wika ni Archbishop Charles Brown, apostolic nuncio ng Vatican sa Pilipinas, kanina sa media.

"Justice is the foundation of peace in the society. If there isn't justice, when people can't receive justice, they react in violent ways. So whenever we can promote justice in the society, we are promoting peace."

Bagama't may separation of Church and State, matatandaang isa ang namayapang Jaime Cardinal Sin sa mga nanawagang protektahan si Fidel Ramos sa pamamagitan ng pagpapalibot sa headquarters ng kapulisan at militar noong 1986. 

Dating lider-militar si Ramos sa ilalim ng diktadura bago tuluyang kumalas kay Marcos, hanggang sa naging presidente rin noong 1992.

"The revolution is not over and the work remains unfinished until every Filipino enjoys the freedoms and rights embodied in our Constitution, our democracy secure, and we regain our seat at the table of the community of nations," wika ni Ramos sa ulat kanina ng GMA News. — James Relativo