Pagbabakuna sa Pebrero dapat mabilis – Duque
Mawawalan ng bisa kung patatagalin
MANILA, Philippines — Nais ni Health Secretary Francisco Duque III na mapabilis ang proseso ng vaccination program ng pamahalaan na inaasahan ngayong Pebrero dahil sa pangamba na mawalan ito ng bisa kung patatagalin ito.
Sabi ni Duque, ang pagkakaroon lamang ng ‘shelf life’ ng mga bakuna ng hanggang anim na buwan at ang pagiging sensitibo nito sa temperatura kaya maaaring mawalan na ito ng bisa kung babagal pa ang proseso sa pagpapabakuna.
Maaari umanong umabot sa P85 bilyong pondo para sa COVID-19 vaccine ang masasayang kung mawawalan ang mga ito ng bisa dahil sa maling pamamahala sa ‘storage’ at pagbagal sa distribusyon.
Pangunahing alalahanin ang ‘shipment storage’ pagdating ng bakuna, pagkakaroon ng national at regional hubs, mga bodega at kung paano ibibiyahe ang mga ito.
Una nang sinabi ni vaccine czar Secretary Carlito Galvez Jr. na higit isang milyong doses ng bakuna ang darating sa bansa sa Pebrero na hudyat ng pag-uumpisa ng vaccination program. Manggagaling ang mga bakuna sa mga manufacturers na AstraZeneca, Pfizer at Sinovac.
- Latest