18 top schools tinukoy sa NPA recruitment

MANILA, Philippines — Ibinunyag ng isang AFP general ang 18 kila­lang mga unibersidad kung saan nangyayari ang umano’y aktibong recruitment mga rebeldeng New People’s Army (NPA) sa mga estudyante.

Ayon kay Lt. Gen. Antonio Parlade Jr., Commander ng AFP-Southern Luzon Command at Spokesman ng National Task Force to End Local Communist Armed Conflict (NTF-ELCAC), bukod sa University of the Philippines-Diliman at UP Manila namonitor ng kanilang intelligence opera­tives ang isinasagawang recruitment ng NPA sa Polytechnic University of the Philippines (PUP), Far Eastern University (FEU), Ateneo de Manila University (ADMU), University of Santo Tomas (UST), Pamantasan ng Lungsod ng Maynila (PLM), De La Salle University (DLSU)  at University of Makati.

Minamanmanan din ang University of the East (UE) sa Recto, UE Caloocan, Adamson University, Emilio Aguinaldo College, Eulogio Amang Rodriguez Institute of Science and Technology, San Beda College, Lyceum of the Philippines, Caloocan City College at iba pa.

Ayon kay Parlade, posibleng lingid sa kaalaman ng mga opisyal at administrasyon ng naturang mga kolehiyo at unibersidad ang recruitment na isinasagawa ng NPA rebels sa kanilang mga estudyante.

Bahagi umano ng re­cruitment ang pagpapalabas ng mga pelikula sa online hinggil sa ‘dark years’ ng Batas militar sa ilalim ng rehimen ni da­ting Pangulong Ferdinand Marcos at ang pagsibol ng bagong diktador sa katauhan ni Pangulong Rodrigo Duterte.

May mga estudyante rin umano sa UP ang nakikipagsabwatan sa CPP-NPA upang patalsikin sa puwesto si Pangulong Duterte.

Bukod dito, sinabi pa ni Parlade na una nang  narekober ng militar ang mga dokumento ng kumperensya na isinagawa ni CPP founder Joma Sison sa UP.

Magugunitang kinansela na ni Defense Secretary Delfin Lorenzana ang 33 taong UP-DND Accord na nagbabawal sa militar at pulisya na pumasok sa UP campus ng walang permiso sa pangasiwaan nito.

Hinamon din ni Loren­zana si UP President Danilo Concepcion na ipaliwanag muna nito kung bakit maraming mga estudyante ng UP na na-recruit ng NPA rebels ang namamatay sa engkuwentro sa tropa ng militar bago nila pagbigyan ang isang dayalogo.