Duterte pwedeng suspindihin ang PhilHealth, SSS contribution hike

MANILA, Philippines — Inaprubahan na sa dalawang panel ng Kamara ang panukalang bigyan ng kapangyarihan si Pangulong Rodrigo Duterte para suspindihin muna ang pagtataas ng kontribusyon ng PhilHealth at Social Security System (SSS) sa panahon ng national emergency.

Magkahiwalay na inaprubahan ng House Committee on Health ni 4th District Rep. Helen Tan at Committee on Government Enterprises and Privatization ni Parañaque City Rep. Eric Olivarez ang House Bill (HB) Nos. 8316 at 8317 na inihain ni Speaker Lord Allan Velasco.

Sa ilalim ng nasabing mga panukala ay mabibigyan ng kapangyarihan si Pangulong Duterte na konsultahin ang Secretaries ng Department of Health at Department of Finance bilang Chairpersons ng PhilHealth at SSS para suspendihin ang implementasyon ng nakatakdang pagtataas ng premium rates sa panahon ng emergency tulad ng COVID-19 pandemic.

“We thank our colleagues for recognizing that urgent actions such as postponing PhilHealth and SSS contribution hikes are necessary to provide much-needed relief to our kababayans as the country conti­nues in its fight against COVID-19,” pahayag ni Velasco.

Una nang nagbabala si Velasco na ang pagtataas ng kontribusyon sa SSS ngayong buwan ay makakaapekto sa mga manggagawa na hindi pa nakakabangon sa pandemya lalo pa at marami ang mga nagsarang negosyo, nawalan ng trabaho at nabawasan ng kinikita.

Pinuna ni Velasco na ang unemployment rate sa bansa ay nasa 8.7 % nitong Oktubre 2020 na katumbas ng 3.8 M na mga Pilipino sa hanay ng paggawa.

“Even today, while some restrictions may have been lifted, most livelihood, businesses, and other sources of income remain shuttered and closed, while many Filipinos remain unemployed,” sabi ni Velasco.