'I-deport!': POGO workers na tinurukan ng smuggled COVID-19 vaccine nais pauwiin

MANILA, Philippines — Dapat maparusahan at pauwiin sa kani-kanilang mga bansa ang mga banyagang nagpaturok ng hindi rehistradong bakuna laban sa coronavirus disease (COVID-19), paggigiit ng senador matapos aniya labagin ang batas.

Ito ang panawagan ngayon ni Sen. Richard Gordon, Miyerkules, matapos maibalitang nasa 100,000 Philippine offshore gaming operators (Pogo) workers — karamihan Tsino — ang nabigyan ng bakunang walang otorisasyon ng Food and Drug Administration (FDA).

"There’s a law. They’re foreigners, they come in here, they should [be vaccinated] within what the law requires and if they don’t do that, they’re in violation and they can be deported," ani Gordon sa panayam ng ANC.

"And if there’s success, [in the vaccine], I don’t care, they violated the law. As simple as that."

Ang balita tungkol diyan ay pumutok matapos isiwalat ng ng civic leader na si Teresita Ang-See, habang mainit ang iligal na paggamit ng unauthorized vaccines, o anumang COVID-19 vaccines, sa loob Pilipinas.

Sa ilalim ng Republic Act 9711, o FDA Act of 2009, bawal ang pagmamanupaktura, pagpapasok sa Pilipinas, pag-aangkat, bentahan, pamamahagi, non-consumer use, atbp. ng mga bakunang walang rehistro mula sa FDA.

Sa kabila niyan, ipinagtatanggol ng Malacañang ang paggamit ng mga hindi otorisadong bakuna ng mga miyembro ng Presidential Security Group, Armed Forces of the Philippines at ilang kawani ng Gabinete.

Basahin: Use of unregistered vaccine illegal – FDA

May kinalaman: Duterte tells PSG to 'shut up' on use of smuggled COVID-19 vaccines during probe

"They’ve been violating the law left and right, I have nothing against the Chinese... but when it comes to something that the public is going to use, the law requires that there be testing done by the FDA, certification by the FDA," dagdag pa ni Gordon.

"Any health product must be registered with the FDA before it can be imported, distributed, used and administered. Here they used it, and they administered it and they distributed it, all in violation of the law."

Sa ilalim ng batas, pwedeng humarap sa pagkakulong, maliban sa multa, ang mga lalabag sa RA 9711. Nakatakdang makakuha ng unang 50,000 vaccines mula sa Chinese manufacturer na Sinovac ang mga medical workers, ngunit kinakailangan pa nila makakuha ng emergency use authorization bago ito maiturok sa publiko.

Basahin: Kilalanin: Unang 25-M Pinoy na tuturukan ng COVID-19 vaccine ayon sa sektor

May kinalaman: 'Sa sabon nga choosy tayo': Vice Ganda binanatan gustong COVID-19 vaccine ng Malacañang

Kaugnay niyan, una nang sinabi ng FDA na pwede nilang bigyan ang ilang maliliit na grupo ng "compassionate special permits (CSPs)" ang ilang grupo para makagamit ng mga gamot gaya ng COVID-19 vaccines.

"[I]f it’s going to be a smaller group po, for example po ‘yung PSG, and of course priority naman po talaga nila na kayo ay proteksyunan, then we can give po compassionate special permit for this kasi maliit lang naman po ‘yon and then a hospital can take care of it and a doctor can administer them safely... of the people who will be vaccinated," ani FDA director general Eric Domingo noong ika-4 ng Enero.

"So for small ano po — small quantities, kahit po wala pang EUA, we can do ano po special permits for that. There’s a way po to ano — to… Naiintindihan naman po natin ‘yung importance po ‘no ng what they do and there’s a safe way to do it if kung gusto po nilang gawin." — James Relativo