Gamit ng nawawalang UP prof. narekober sa Occidental Mindoro
MANILA, Philippines — Natagpuan ng mga awtoridad sa baybayin ng Barangay Balikyas sa bayan ng Looc sa Occidental Mindoro ang mga kagamitan ng nawawalang University of the Philippines (UP) law professor na si Atty. Ryan Oliva.
Batay sa ulat ni Occidental Mindoro Police director Col. Hordan Pacatiw, natagpuan ang gray na backpack ni Oliva na naglalaman ng mahahalagang personal na gamit.
Natagpuan umano ito ng residenteng kinilalang si Jinny Histas bandang alas-6 kahapon ng umaga.
Mamimingwit umano si Histas nang mapansin ang bag na bahagyang natatabunan ng buhangin at basura.
Gayunman hindi naman nakita sa lugar si Oliva.
Nasa loob ng bag ang iba’t ibang ID ni Oliva maging ATM card isang Android phone.
Matatandaan na Nobyembre 21 nawala si Oliva, na hepe ng Legislative Liaison Unit ng Department of Tourism.
Nanawagan naman ang pamilya ni Oliva sa kahit anong impormasyon na makatutulong sa pagtunton sa UP Law prof.
Ayon sa kanyang pamilya na maaaring ipagbigay ang impormasyon sa +63 906 300 1009, +63922 860 1900, o sa e-mail [email protected].
- Latest
