Abogado ni De Lima, binalaan ng VACC
MANILA, Philippines — Binalaan ng grupong Volunteers Against Crime and Corruption (VACC), ang abogado ni Sen. Leila de Lima dahil sa sunud-sunod na pahayag nito na nalathala sa maraming pahayagan na diumano’y lumalabag sa sub judice rule ukol sa mga kasong hinaharap sa kasalukuyan ng senadora.
Ayon sa isang pahayag, sinabi ng puno ng Legal Committee ng VACC na si Atty. Ferdinand Topacio na posibleng maging “liable for indirect contempt of court” si Atty. Boni Tacardon dahil nagdidiskurso na raw ito sa “merits of the case” gayong nasa paglilitis pa ang kaso ni De Lima.
Maaalalang ang VACC ang isa sa mga grupong nagsampa ng orihinal na kaso laban kay De Lima ukol sa tinatawag na “Bilibid Drug Trade” noong Setyembre ng 2017.
Sinabi ni Topacio na naghahanda ang VACC na magsampa ng kaso laban kay Tacardon dahil maaari raw makaimpluwensiya sa korte at magalit ang mga taong-bayan sa justice system sa bansa dahil sa mga pinagsasabi ni Tacardon.
- Latest
