P73.2 bilyon inilaan sa COVID-19 vaccine ng 60 milyong Pinoy

MANILA, Philippines — Naglaan ng P73.2 bilyon ang pamahalaan para sa COVID-19 vaccine ng 60 milyong Filipino.

Sa press briefing kay Pangulong Rodrigo Duterte nitong Lunes, sinabi ni Finance Secretary Carlos Dominguez III na sa estimate nila, aabot ang halaga ng bakuna sa $25 o P1,200 kada tao.

Ang P40 bilyon ay kukunin sa World Bank, P20 bilyon sa Land Bank at DBP, at P13.2 bilyon sa bilateral agreements sa ibang bansa na gumagawa ng bakuna.

Samantala, sinabi naman ni Health Secretary Francisco Duque III na magkakaroon na ng “herd immunity” kapag nabakunahan ang nasa 60 milyong Filipino.

Ang herd immunity anya ay mula sa 60-70 percent ng populasyon ng bansa, na ayon sa World Health Organization ay kapag naabot ang nasabing bilang ay malaki ang posibilidad na mawala na ang COVID-19 sa bansa.

Uunahin sa bakuna ang mga mahihirap, frontliners, mga sundalo, pulis at mga vulnerable.