‘Sofia 2’ antigen test aprub ng DOH

MANILA, Philippines — Available na sa Pilipinas ang isang antigen test kits na may mataas na porsyento ng sensiti-vity para sa pagtukoy sa COVID-19 na lagpas pa sa standard na itinakda ng World Health Organization (WHO).

Ito ay ang Sofia 2 SARS Antigen Fluorescent Immunoassay (FIA) ng Quidel Corporation na unang COVID-19 antigen test na pinayagan ng United States Food and Drug Administration at FDA Philippines at nabigyan na rin ng validation ng Department of Health (DOH) para magamit sa bansa.

Ayon sa DOH, ang na­sabing antigen tests na dumaan sa validation ng Research Institute for Tropical Medicine (RITM), US FDA, WHO-Foundation of Innovative New Diagnostics (FIND) ay maaari     nang magamit ng publiko.

Ang Sofia 2 SARS Antigen FIA ay unang rapid point-of-care test na pinahintulutan ng Emergency Use Authorization (EUA) ng US FDA noong nakalipas na Mayo, bilang game changer antigen test  na may 96.7% sensitivity, lagpas sa itinakda ng WHO na 80% sensiti-vity standard.

Mabilis na makikita ng antigen ang mga fragment ng mga protina sa loob ng virus sa pamamagitan ng swab at otomatiko itong magbibigay ng resulta sa loob ng 15 minuto. 

Inilarawan ni Dating US FDA Commissioner Dr. Scott Gottlieb ang SOFIA 2  bilang “real game changer” dahil sa pinahusay na matukoy ang COVID-19.