GCQ sa Metro Manila, 6 probinsya sa Nobyembre 1-30 pinal na

MANILA, Philippines— Hindi na babaguhin at mananatili ang umiiral na General Community Quarantine (GCQ) sa Metro Manila at anim pang probinsiya sa buong buwan ng Nobyembre.

Ayon kay Presidential Spokesperson Harry Roque, naisapinal na ang mga quarantine classifications matapos ang takdang panahon na ibinigay sa mga lokal na pamahalaan upang mag-apela.

Bukod sa Metro Manila, iiral ang GCQ sa Batangas, Iloilo City, Bacolod City, Tacloban City, Iligan City at Lanao del Sur.

Maliban sa mga nabanggit na lugar, iiral ang modified general community quarantine (MGCQ) sa buong bansa.

“Ang iba’t ibang lugar pa po ng Pilipinas na hindi nabanggit ay mapapasailalim sa MGCQ. Ibig sabihin po nito, wala pong nagbago doon sa naanunsiyo na quarantine guidelines ng ating Presidente,” ani Roque.