Evacuation sites at quarantine facilities tiyaking hiwalay - Palasyo

MANILA, Philippines — Pinatitiyak ng Malacañang na hindi dadalhin sa mga quarantine sites ang mga evacuees na naapektuhan ng bagyong Quinta.

Ayon kay Presidential Spokesperson Harry Roque, may mga guidelines naman ang National Disaster Risk Reduction and Management Council (NDRRMC) ngayong may pandemiya na sinabayan ng bagyo at isa rito ang paghihiwalay ng evacuation centers sa mga quarantine sites.

Kabilang aniya sa guidelines ng NDRRMC ay ang pagkakaroon ng preemptive evacuations sa mga naninirahan sa mga delikadong lugar, pagsusuot pa rin ng face mask at face shields at physical distancing sa mga evacuation centers.

Hindi rin aniya dapat isama sa mga inililikas ang mga may sintomas ng COVID-19 kahit pa mild o konti lamang ito.