Anti-Height Requirement Law isinulong

MANILA, Philippines — Isinusulong ni ACT-CIS Cong. Eric Yap sa Kongreso ang House Bill 7740 o Anti-Height Requirement Law na umano’y diskriminasyon sa mga nais makapagtrabaho.

Ayon kay Yap, hindi dapat na nilalagyan ng height requirement ang mga trabaho dahil mas mahalaga ang kakayahan ng isang manggagawa.

“Hindi porke’t hindi ka matangkad ay bawal ka nang tanggapin sa trabaho?” ani Yap.

Aniya, may mga trabaho na hindi naman kailangan ng tangkad tulad ng mga receptionist o waiter sa mga hotel at restaurant, sa mga opisina, sa barko o eroplano.

Kinuwestiyon ni Yap ang height requirement sa pulis at militar. Aniya, importante na maayos ang pangangatawan at marunong humawak at magpaputok ng baril ang pulis at sundalo upang makapasok sa PNP at AFP.

Hirit pa ni Yap, chairman din ng appropriations committee, na ang lahi ng mga Pinoy ay hindi matatangkad kaya dapat alisin na ang height requirement para sa kapakanan ng nakararaming Filipino.