Pre-registration sa National ID sisimulan sa Oktubre 12 – PSA
MANILA, Philippines — Sisimulan na sa October 12 ang unang bahagi ng mass registration para sa National ID System.
Ayon kay Philippine Statistics Authority (PSA) Assistant Secretary Rosalinda Bautista na bahagi ng Step 1 ng registration ay kapapalooban ng house-to-house ng mga piling pre-registrants para makuha ang kanilang impormasyon at maitakda ang araw para makapunta ang mga ito sa registration center.
Sinabi ni Bautista na ang mga napiling pre-registrants ay padre pamilya ng 5 milyong low-income households at kinilala batay sa data na naibigay ng Department of Social Welfare and Development.
Anya, ang paunang pagtatala sa mga nabanggit ay magbabawas ng kanilang panahon sa paghihintay kapag sila ay nagtungo sa registration centers para sa Step 2 ng proseso ng pagrerehistro.
Sa ilalim ng Republic Act No. 11055 o Philippine Identification System Act, magkakaroon ng sapat na impormasyon ang mamamayan na target pagkalooban ng pangunahing serbisyo ng pamahalaan.
Ang National ID System ay inaasahang malaking tulong para mapabilis ang transaksiyon sa public at private sector, enrollment sa mga paaralan at pagbubukas ng bank accounts.
- Latest