Cayetano, Pulong nagkita sa Davao
MANILA, Philippines — Para umano maayos ang gusot sa liderato ng Kamara, personal na nagtungo nitong Sabado sa Davao City si Speaker Alan Peter Cayetano para makipagkita sa anak ni Pangulong Duterte na si House Deputy Speaker Paolo “Pulong” Duterte.
Kasama ni Cayetano ang kanyang misis na si Taguig Rep. Lani Cayetano, House Appropriations Committee chairman ACT-CIS Partylist Rep. Eric Go Yap at House Deputy Sec. General Brian Yamsuan.
Ito ay matapos na ibahagi ni Cong. Yap ang larawan nila sa kanyang Instagram na may caption na “Chillax night”, kasunod ang isa pang larawan na nasa tabi sila ng swimming pool.
Tumanggi naman ang kongresista na ilahad ang mga detalye ng kanilang napag-mitingan.
Ayon kay Yap, nagkaroon lamang sila ng casual conversation subalit ang P4.5 trillion na panukalang 2021 budget na umano’y ugat ng sinasabing power struggle sa Kamara ay hindi nila napag-usapan.
Giit pa ni Yap, allergic ang batang Duterte sa budget kaya hindi na nila ito pinag-usapan.
Matatandaan na nagbanta noon si Paolo Duterte na kakausapin ang Mindanao bloc para paalisin si Cayetano sa puwesto matapos ang gulo sa 2021 budget.
- Latest