1 meter distancing sa PUVs mananatili - Duterte
MANILA, Philippines — Pinapanatili ni Pangulong Rodrigo Duterte ang one-meter physical distancing ng mga pasahero sa mga pampublikong sasakyan.
Ayon kay Presidential Spokesman Harry Roque, nagdesisyon na ang Pangulo kasunod ng naging rekomendasyon ng Inter-Task Force for the Management of the Emerging Infectious Diseases (IATF) at matapos timbangin ang iba’t ibang posisyon ng mga eksperto.
Bukod sa pagpapanatili ng isang metrong distansya, mandatory rin ang pagsusuot ng mga pasahero ng face mask, face shield at bawal ang pagsasalita o paggamit ng cellphone.
Bawal din ang pagsasalita at pagkain at kailangang i-sanitize ang mga pampublikong transportasyon.
“Uulitin ko po ang desisyon ng ating Presidente ay panatilihin po muna ang one-meter social distancing sa mga pampublikong transportasyon na sasamahan din ng pagsuot ng mask, ng face shield, bawal po ang salita at bawal po ang pagkain at pagsasanitize po ng mga pampublikong transportasyon,” ani Roque.
Inihayag naman ng Department of Transportation (DOTr) na susundin ang utos ng Pangulo.
Matatandaan na mula sa 1 metrong distansiya ay ginawang 0.75 metro ng DOTr ang distansiya ng mga pasahero pero agad ding sinuspindi at hinintay ang desisyon ng Pangulo sa isyu.
Una nang nirekomenda ng mga UP experts na huwag ibababa sa 1 meter ang physical distancing sa PUVs dahil lalong dadami ang kaso ng COVID-19.
Pero sinabi ni Tugade na ang naging desisyon na bawasan ang social distancing ay produkto ng pag-aaral ng Philippine National Railways at marami na anyang bansa ang nagbawas ng physical distance mula one meter pababa.
- Latest
