PhilHealth balak ipabuwag ni Duterte

MANILA, Philippines — Nais umano ni Pangulong Rodrigo Duterte na buwagin o isapribado na lamang ang Philippine Health Insu-rance Corp. dahil sa nabunyag na mga anomalya.

Sinabi ni Senate President Vicente Sotto III na inihayag ito ng Pangulo sa kanilang pulong noong Miyerkules ng gabi.

Pero ayon kay Sotto, dapat tingnan muna ang performance ni ex-NBI director Dante Gierran, na itinalagang presidente ng PhilHealth at CEO kapalit ng nagbitiw na si Ricardo Morales.

Dahil dito, binigyan ni Pangulong Duterte ng hanggang Disyembre si Gierran para linisin ang isyu ng korapsiyon sa PhilHealth.

Pumayag din umano si Duterte sa panukala ni Sotto na ang kalihim ng Department of Finance ang mamuno sa PhilHealth Board sa halip na ang kalihim ng Department of Health.

Ipinaliwanag umano ni Sotto sa Pangulo na ang PhilHealth ay isang insurance corp. at hindi isang health entity.

Bukod kay Sotto, kasama rin sa miting sina House Speaker Alan Peter Cayetano, House Majority leader Martin Romualdez at Sen. Bong Go.