Online class suspendido ‘pag may bagyo – DepEd
MANILA, Philippines — Maaari pa ring masuspinde ang klase ng mga mag-aaral kung panahon ng bagyo, kahit pa online o distance learning na ang ginagamit ngayon spagtuturo, dahil sa posibilidad na mawalan ng suplay ng kuryente.
Sa isang virtual briefing, sinabi ni DepEd Undersecretary Diosdado San Antonio na kadalasang nagkakaroon ng brownout o pagkawala ng suplay ng kuryente kapag may bagyo kaya’t tiyak aniyang masususpinde rin ang pasok ng mga bata.
Ayon pa kay San Antonio, kung siya ang tatanungin ay dapat na walang pasok ang araw ng bagyo o yung panahong nagre-restore pa ng kuryente.
Nauna rito, nagpasya ang DepEd na magkaroon na lamang ng distance learning sa bansa upang maipagpatuloy pa rin ang pag-aaral ng mga bata kahit pa may COVID-19 pandemic sa bansa.
Hindi rin sinang-ayunan ng DepEd ang panawagan ng ilang grupo na magkaroon ng academic freeze sa bansa dahil sa pandemic.
Sa ngayon ay nasa mahigit 24 milyon na ang enrollees para sa School Year 2020-2021.
Inaasahan namang madaragdagan pa ang naturang bilang dahil tiniyak na ng DepEd na tatanggap pa sila ng late enrollees hanggang sa Nobyembre.
Ang mga estudyante sa mga pribadong paaralan ay nagbalik-klase na nitong Agosto, habang sa mga pampublikong paaralan sa bansa ay nakatakda sa Oktubre 5.
- Latest
