Russian vaccine susuriin muna bago payagan – FDA
MANILA, Philippines — Aalamin pa ng Food and Drugs Administration (FDA) kung paano naaprubahan agad ang na-develop na Russian vaccine na tinawag na “Sputnik V”, kung hindi pa ito nakakakumpleto sa clinical trials.
Sinabi ni FDA Director-General Eric Domingo na nakababahala kung hindi pa subok ang ‘safety and efficacy’ dahil hindi pa man dumadaan sa last phase ng clinical trials ay sinasabing ‘approved’ na sa Russia para gamitin.
Hindi aniya ibig sabihin na porke na-approve na sa Russia ay otomatikong approve na rin sa Pilipinas.
“Ang FDA, sinusuri niya lahat ng data. Kailangan maipakita po sa amin ‘yung data, findings, tsaka ‘yung scientific na mga information about the vaccine to assure na safe siya at tsaka effective siya,” aniya pa.
Maaari lamang aprubahan ng FDA ang nasabing bakuna kung natapos na ang malawakang testing o ang Phase 3.
Nabatid na may 28 bakuna ang dini-debelop sa mundo kung saan anim na ang nasa Phase 3 ng clinical trials.
Ang Sputnik V ng Russia ay nasa Phase 1 pa lamang umano ng clinical trials.
Nabatid na kahapon (Agosto 12) ang pakikipagpulong ng Gamaleya Institute, ang gumawa ng Sputnik V vaccine, sa Department of Science and Technology (DOST) para alamin kung ano ang meron sa bakunang ito at mapag-aralan bago magbigay ng rekomendasyon kay Pangulong Rodrigo Duterte.
Matatandaang ang Russian Government ang nagpasok ng proposal sa Pilipinas na handa silang magsuplay ng na-develop na Russian vaccine.
Dahil dito, hindi umaasa ang Department of Health (DOH) na magkakaroon na ng bakuna sa Disyembre.
Sinabi ni Health Undersecretary Maria Rosario Vergeire na kaila-ngang matapos muna ang ‘‘clinical trials’ bago makita na puwede na itong gamitin at ilabas para sa ‘mass reproduction at consumption’’.
Related video:
- Latest
