Netflix, Spotify, Lazada, Shopee papatawan ng 12% VAT
MANILA, Philippines — Papatawan ng 12% Value Added Tax (VAT) ng pamahalaan ang digital service providers na gumagamit ng digital at electronic platforms tulad ng Netflix, Spotify, Lazada, Shopee at iba pa.
Ayon kay Albay 2nd District Rep. Joey Salceda, chairman ng House Committee on Ways and Means, inaprubahan na ng kaniyang komite ang panukalang batas para pagbayarin ng 12 % VAT ang mga dayuhan at lokal na kumpanya na nagbebenta ng product gamit ang digital at electronic platforms.
Ang nasabing substitute bill ay naglalayong amyendahan ang Section 105-A ng National Internal Revenue na may probisyon sa mga non-resident digital service providers na magbayad ng tax sa gobyerno.
“Iyong malalaking kumpanya katulad ng Netflix, nagbebenta sa Pilipinas kaya dapat magbayad ng VAT. Pero wala nang income tax kasi we [in the bill] did not require them to have a domicile here,” pahayag ni Salceda.
Kung maging batas, inaasahan na kikita ang pamahalaan ng P10 bilyon sa buwis.
- Latest
