Duterte gustong makaharap ang 9 pulis na nakapatay sa 4 Army men
MANILA, Philippines — Balak kausapin ni Pa-ngulong Rodrigo Duterte ang siyam na pulis na nakapatay sa 4 na sundalo sa ng Jolo, Sulu nitong Lunes.
Ayon kay Presidential Spokesperson talagang nalungkot ang Pangulo sa nangyaring “misencounter” at iniutos na bilisan ng National Bureau of Investigation ang isinasagawang imbestigasyon.
Bagaman at hindi nagbigay ng detalye, sinabi ni Roque na sinabihan ng Pangulo si Interior Secretary Eduardo Año na nais niyang makausap ang siyam na pulis na naging dahilan nang pagkamamatay ng apat na sundalo.
“Without revealing kung kailan at saan mangyayari ang pagpupulong ay hiningi ni Presidente kay Secretary Año na gusto niyang makausap iyong mga pulis, iyong siyam na pulis na diumano ay nagpaputok doon sa apat na Army personnel, kasama ang isang Major,” sabi ni Roque.
Idinagdag pa ni Roque na bukod sa nalungkot ang Pangulo, ang ginamit pa nitong salita ay “nanlambot siya” nang malaman ang nangyari at gusto na agad pumunta sa lugar upang itaas ang morale ng mga sundalo.
“Lungkot na lungkot siya. Ang ginamit nga niyang salita ay siya ay nanlambot, extremely sad at gusto niya na pumunta mismo doon sa lugar kung saan nangyari, kung pupuwede, dahil gusto niyang ma-lift ang morale ng kasundaluhan dahil talagang parang mababa ang morale ng ating mga kasundaluhan,” sabi ni Roque.
Idinagdag aniya ng Pangulo na hindi dapat nagpapatayan ang may parehong idelohiya at sana ay huli na ang nasabing misencounter sa kanyang termino.
- Latest