PNP handa na sa GCQ sa NCR
MANILA, Philippines — Bagama’t malaking hamon, tiniyak ng Philippine National Police (PNP) na handa na sila ngayong nasa general community quarantine (GCQ) na ang Metro Manila.
Ayon kay PNP Joint Task Force COVID Shield Commander P/Lt. General Guillermo Eleazar, mas maraming tao ngayon ang pinapayagang umalis sa kani-kanilang mga tahanan at mas maraming sasakyan ang inaasahang bibiyahe.
Papayagan ang tren at bus augmentation, taxi, TNVS (transport network vehicle service), shuttle services, point-to-point buses, mga bisikleta at traysikel.
Hindi naman kabilang ang public utility buses, UV Express units at mga jeep sa papayagang makabiyahe sa unang phase ng pagbabalik ng pampublikong transportasyon simula ngayon hanggang Hunyo 21.
Aniya, magsasagawa pa rin ng random checking ang PNP sa mga motorista upang tingnan kung sila ay authorized persons outside residence (APOR) o mga manggagawa sa mga industriyang pinayagan nang mag-operate sa ilalim ng GCQ.
Kailangang ipakita ng mga motorista ang kanilang rapid pass o company ID upang patunayang pinapayagan silang magtrabaho sa ilalim ng GCQ.
Nagpaalala rin si Eleazar sa publiko na kunin lamang sa kanilang mga lugar ang mga mahahalagang produkto at serbisyo dahil matatagpuan doon ang mga supermarket, drug store at iba pang establisimyento.
Aniya, hindi dapat mag-cross ng border dahil nananatili pa rin ang quarantine. Hindi pa rin normal ang sitwasyon sa ilalim ng GCQ.
Para naman sa mga nagbabalak na magtungo sa shopping malls, tanging edad 21 hanggang 59 lamang ang papayagang makapasok ng mga mall.
Subalit maaaring makontrol ng mga mall ang pagpasok ng mga mamimili, sa pamamagitan ng pagtatalaga ng pinakamaraming bilang ng mga mamimili sa floor area.
Muli namang iginiit ni Eleazar na kailangang kumuha ng travel authority mula sa mga awtoridad ang mga nais bumiyahe palabas ng Metro Manila.
- Latest
