Cebu City, Mandaue GCQ na rin
MANILA, Philippines — Inilagay na rin sa general community quarantine ang Cebu City at Mandaue City, ayon kay Presidential Spokesperson Harry Roque.
Sa meeting ng Inter-Agency Task Force(IATF) on Emerging Infectious Diseases, napagdesisyunan na ilagay na rin sa GCQ ang dalawang siyudad simula Hunyo 1 hanggang 15.
Bukod sa Cebu City at Mandaue City, ilalagay din sa GCQ ang Pangasinan, Region 2, Region 3, Region 4-A, National Capital Region kabilang ang munisipalidad ng Pateros, Region 7, Zamboanga City, at Davao City. Ang mga hindi naman nabanggit na lugar ay isasailalim sa modified general community quarantine (MGCQ).
Nilinaw ni Roque na magiging limitado pa rin ang galaw ng mga mamamayan at pampublikong sasakyan sa ilalim ng GCQ.
Mas magiging maluwag naman ang panuntunan sa quarantine sa mga lugar na nasa ilalim ng MGCQ.
Ipinaliwanag din ni Roque na ang MGCQ ang “transition phase” o nasa gitna ng GCQ patungong “new normal.” Pero mananatili pa rin ang presensiya ng mga pulis para masiguradong nasusunod ang community protocols.
- Latest
