Dayuhang nakaalitan ng pulis habang lockdown ipinade-deport ng immigration

MANILA, Philippines — Hinainan ng "deportation" charge ng Bureau of Immigration (BI) ang isang Espanyol matapos makaalitan ang isang pulis sa gitna ng enhanced community quarantine (ECQ) sa Makati noong Abril.

Kinumpirma ni BI Commissioner Jaime Morente ang charge laban kay Salvador Parra, na nakatikim ng pamimisikal ng pulis matapos umiwas sa pagkakaaresto nang ipagtanggol ang kasambahay na nagdidilig nang walang facemask sa bakuran.

Una nang iginiit ni Parra na hindi dapat parusahan ang kanyang kasambahay dahil nagdidilig lamang siya sa loob ng kanilang pamamahay. Sugatan tuloy ang banyaga nang magkagirian.

Pero banggit ng BI, "overstaying" at "undesirable" na raw ang banyaga kung kaya't nararapat na ma-deport palabas ng Pilipinas.

"Foreign nationals who are here in the country are expected to follow Philippine laws, especially in these special times wherein public health and safety is at risk," sabi ni Morete.

"There is no exemption, whether you are living in a posh village, or in a slum area, you must obey the law."

May asawang Filipina, nanunuluyan si Parra sa Dasmariñas Village, isang eksklusibong lugar sa Lungsod ng Makati.

Sabi pa ng bureau, maaaring ituring na "undesirable alien" ang mga dayuhang tahasang nagbabalewala sa batas at bumabastos sa otoridad.

Una nang ipinasusumite ng counter-affidavit si Parra upang sagutin ang mga reklamo sa kanya ngunit tumanggi raw na tugunan ito. 

Nagdaan na lang tuloy ang ika-21 ng Mayo, na takdang petsa ng pagsusumite, nang hindi siya nagco-comply kahit bukas naman daw ang tanggapan ng BI.

Overstaying?

Maliban diyan, sobra-sobra na raw ang panahong inilagi ni Parra sa Pilipinas alinsunod sa batas, dahilan para mapaalis siya ng bansa.

"Upon investigation by our intelligence division, it was confirmed that he has failed to extend and has already overstayed his visa," sabi ni Morete.

Pursigido ang panig nina Morente na itulak ang kaso para magsilbing halimbawa na rin daw sa mga dayuhang nais lumabag sa batas.

Ang nasabing deportation case ay hiwalay pa sa mga kasong kriminal na inihain laban sa kanya ng pulis. — James Relativo at may mga ulat mula kay Kristine Joy Patag