Mas mahigpit na parusa sa perjury inaprub ng Senado
MANILA, Philippines — Inaprubahan na ng Senado sa ikatlo at pinal na pagbasa ang panukalang nagbibigay ng mas mahigpit na parusa at malaking multa sa sinumang mga testigo na magsisinungaling sa kanilang mga sinumpaang salaysay.
Sinabi ni Senador Richard Gordon, chairman ng Senate committee on justice and Human Rights na nag-sponsor ng Senate Bill 1354 na ang mas mabigat na parusa sa ilalim ng batas ang naglalayong pigilan ang mga tao mula sa pagsisinungaling sa kanilang mga sinumpaan sa pagtestigo tulad ng mga legislative hearings.
Bukod kay Gordon, co-authored din ng panukala sina Senate President Vicente Sotto III, Senate Majority Leader Juan Miguel Zubiri, at Senators Panfilo Lacson at Leila de Lima.
Naaprubahan ang panukala sa botong 20 na yes at walang negative vote.
Inaamyendahan din ng panukala ang Article 183 ng revised penal code na nagbibigay ng parusang prison mayor o minimum period na anim hanggang 10 taon na pagkakakulong mula sa kasalukuyang arresto mayor o maximum period na apat na buwan hanggang 2 taon pagkakakulong.
Habang ang mga public official o empleyado na magsisinungaling ay magmumulta ng P1 milyon gayundin ang perpetual disqualification sa paghawak ng anumang posisyon o puwesto sa gobyerno.
- Latest
