Hiling na isapubliko ang 'health records' ni Duterte ibinasura ng Korte Suprema

MANILA, Philippines — Ibinasura ng Korte Suprema ang mga petisyong nag-oobliga sa gobyernong ilabas ang "health bulletin" ni Pangulong Rodrigo Duterte.

Sa botong 13-2, sinabi ng News5 na dinismiss ang "extremely urgent petition for mandamus" na inihain ng abogadong si Dino de Leon para utusan ang Office of the President at/o si Executive Secretary Medialdea na ilabas ang tunay na lagay ng kalusugan ng presidente.

JUST IN | Sa botong 13-2, ibinasura ng Supreme Court ang petisyon para isapubliko ang lahat ng health records ni Pres. Rodrigo Duterte—sources | via Dale de Vera pic.twitter.com/IxSeFuhUU7

— News5 AKSYON (@News5AKSYON) May 8, 2020

Hindi pinangalanan ng news organization kung saan nila nakuha ang impormasyon.

Iniutos din ni De Leon na sumailalim sa confirmatory tests si Digong at mailabas ang mga resulta. Ito ay para makumpirma kung nasa mabuting lagay si Duterte para pamunuan ang Pilipinas.

Hindi pa rin inilalabas sa publiko ang desisyon ng korte.

Petisyon ni De Leon

Sa kanyang hiling na makakuha ng writ of mandamus, tinukoy ni De Leon ang mga sakit ni Duterte — bagay na kanya nang inamin:

• Myasthenia Gravis
• Buerger’s Disease
• GERD
• Barrett’s Esophagus

Sa pag-amin daw ni Duterte, makikita raw na humaharap sa sari-saring seryosong sakit ang pangulo: "[S]a minimum, makakapagsanhi ito ng seryosong kahirapan at kapinsalaan sa paggampan niya ng gawain," sabi niya sa Inggles.

Sinabi rin ng petitioner na umamin si Duterte sa paggamit ng Fentanyl, isang tipo ng "opiod pain medication."

"Mahalaga para sa sambayanang Pilipinol na malaman kung meron ba o walang balakid sa kanyang pagdedesisyon, kung malaya ba siya sa anumang kondisyon o substance na maaaring makaapekto para gumawa ng mahusay na hatol," dagdag niya. — James Relativo at may mga ulat mula kina Kristine Joy Patag at News5/Dale De Vera