Kamara balik sesyon na
Video conferencing isasagawa
MANILA, Philippines — Matapos ang halos dalawang buwan, balik-sesyon na muli ang Mababang Kapulungan ng Kongreso na nagpatupad ng mahigpit na health protocols kaugnay ng krisis sa coronavirus disease 2019.
Pinangunahan ni House Speaker Alan Peter Cayetano ang pagbubukas muli ng sesyon at dahilan sa banta ng COVID-19 ay 25 mambabatas lamang ang pinahintulutang dumalo sa session hall habang 276 naman ang nakilahok sa ZOOM teleconferencing at live streaming.
Sinabi ni Cayetano na tulad noong ipasa ang Bayanihan To Heal As One Act o ang Repubic Act 11469 ay magdaraos sila ng video conferencing sa plenary session.
Napagkasunduan rin na sa pagsasagawa ng pagdinig ng mga komite, technical working group meetings, administrative meetings, political caucus at press conferences ay isasagawa sa pamamagitan ng video conferencing.
Ipinatupad din ang social distancing ng mga mambabatas at nakasuot din ang mga ito ng facemask bilang bahagi ng protocol.
- Latest
