Mga senior citizens na walang kasama sa bahay, papayagang lumabas sa GCQ

MANILA, Philippines — Nilinaw ni Interior and Local Government Secretary Eduardo Año na papayagang lumabas ng tahanan para mamili ng pagkain o gamot ang mga senior citizen na naninirahan sa mga lugar na isasailalim sa gene­ral community quarantine (GCQ), ngunit walang ibang kasama sa kanilang tahanan.

Ginawa ni Año ang paglilinaw kasunod nang pag-alma ng ilang senior citizen sa rekomendasyon ng Inter-Agency Task Force (IATF) na pagbawalang lumabas ng bahay ang mga senior citizen na naninirahan sa mga lugar na nasa ilalim ng GCQ.

Ayon pa kay Año, plano nilang paglaanan ng special lane ang mga matatanda para maging mabilis ang kanilang mga transaksiyon at kaagad ring makauwi. 

Pero payo ng kalihim, hanggat maaari ay huwag na munang lumabas ng bahay ang mga mamamayang nasa 60 taong gulang pataas, kung hindi naman kinakailangan dahil nananatili pa rin ang banta ng COVID-19.

Matatandaang sa ilalim ng enhanced community quarantine (ECQ), hindi binibigyan ng quarantine pass ang mga senior citizen upang hindi makalabas ng ta­hanan bilang pag-iingat na rin sa kanila, lalo na at karamihan sa mga dinadapuan ng COVID-19 na binawian ng buhay ay mga matatanda, partikular na kung dati na silang may iniindang karamdaman.