Kahit 'parang martial law,' DOJ pinakalma ang takot ng publiko habang lockdown
MANILA, Philippines — Pinahupa ng Department of Justice ang takot ng marami matapos ang pinakahuling banta ni Pangulong Rodrigo Duterte hinggil sa planong pagpapatupad ng kaayusang mala-batas militar habang ipinatutupad ang enhanced community quarantine (ECQ) sa buong Luzon.
"Walang dapat ikatakot ang publiko kahit 'parang martial law,'" wika ni Justice Secretary Menardo Guevarra, Biyernes.
"It simply means na mas may military presence to help the police enforce the law and that is for the protection, not oppression, of the people."
Huwebes nang gabi nang sabihin ni Digong na hihikayatin niya ang Philippine National Police (PNP) at Armed Forces of the Philippines (AFP) na mag-"takeover" kung hindi magtitino ang publiko't sumunod sa social distancing.
"I am ordering them now to be ready. Ang pulis pati military ang mag-enforce sa distance... social distance at ‘yang curfew. Sila na. Parang martial law na rin. Mamili kayo. Ayaw ko pero pagka-naipit na ‘yung bayan at walang disiplina kayo," banggit ni Duterte kahapon.
"Hindi nga naman ito martial law pero parang martial law na rin in the sense that I have to impose something on you for your own good and for the good of the country and people."
Kahapon lang din nang sisihin ni presidential spokesperson Harry Roque ang mga "pasaway" sa patuloy na paglabas-labas ng bahay kahit na may lockdown na, dahilan para maging numero uno ang Pilipinas sa dami ng COVID-19 cases sa Timog-Silangang Asya.
Pero ayon kay Guevarra, tuloy-tuloy naman daw na tatakbo ang mga korte at mananatili pa rin ang civil authorities kumpara sa militar.
"The military will be there not only to help keep law and order but, more importantly, to instill public discipline, which is most needed in times like this," paliwanag pa ng kalihim.
Kalat ngayon sa kalsada ang mga militar at pulis habang nagbabantay ng mga checkpoints sa sari-saring bahagi ng bansa.
Kasama sa mga parusang iginagawad ng mga unipormadong opisyal sa mga sumusuway sa quarantine measures ang push ups, pagbibilad sa ilalim ng araw, pagkulong sa hawla ng aso at marami pang iba.
Martial law at human rights
Sa taya ng Amnesty International, umabot sa 70,000 ang ikinulong sa ilalim ng Martial Law ni dating Pangulong Ferdinand Marcos mula 1972 hanggang 1981.
Nasa 34,000 naman ang sinasabing sumailalim sa torture noon habang 3,200 naman ang napatay.
Nagpatupad din ng martial law noon si Duterte sa buong Mindanao mula Mayo 2017, bagay na tumagal nang 953 araw kahit mabilis lang na nadurog ang grupong Maute sa Marawi. Ang nasabing martial law ay sinasabing nagluwal din ng human rights violations.
Tuloy-tuloy pa rin ang suspensyon ng lahat ng pampublikong transportasyon, klase at ilang trabaho bilang pagsusumikap ng gobyerno na mapigilan ang pagdami ng COVID-19 infections sa bansa.
Umabot na sa 5,878 ang tinatamaan ng COVID-19 sa Pilipinas. Sa bilang na 'yan, 387 na ang namamatay.
- Latest