Pasaway sa quarantine umakyat na sa 70,000

MANILA, Philippines —  Inihayag ng Philippine National Police na umabot na sa  69,089 ang bilang ng mga lumabag sa ipinatutupad na   enhanced community quarantine ng pamahalaan.

Ayon kay  PNP Deputy Chief for Operations Police Lieutenant General Guillermo Eleazar na siya ring commander ng Joint Task Force COVID-19 Shield, sa bilang na ito ay mayroong 38,940 na lumabag mula sa Luzon at 30,149 naman ang mula sa Visayas at Mindanao.

 Sa kabuuang bilang na ito, 17,039 ang naaresto, 3,777 ang pinagmulta habang 48,273 naman ang pinagsabihan lamang ng mga awtoridad.

 Bukod sa Luzon, ilang lalawigan na rin sa Visayas at Mindanao ang nagpatupad ng enhanced community quarantine dahil sa banta ng novel coronavirus 2019 (COVID-19).

Nauna nang sinabi ni Pangulong Rodrigo Duterte na hanggang Abril 14 ang tatagal ang enhanced community quarantine period sa Luzon.