COVID-19 test kits ng UP, 2 oras lang may resulta na
MANILA, Philippines — Higit na mabilis ang COVID-19 testing kits na nilikha ng mga scientists ng University of the Philippines-National Institutes of Health kumpara sa ginagamit na testing kits mula sa Japan.
Sinabi ni Food and Drugs Authority (FDA) Director General Eric Domingo na kayang makuha ang resulta ng COVID-19 test na dinibelop ng UP-NIH ng dalawang oras kaysa sa 24 oras ng testing kits mula sa Japan.
Mas hamak na mura rin ang UP-NIH kits na nagkakahalaga ng P1,500 kumpara sa imported kits na gagastos ang pamahalaan ng P20,000 hanggang P30,000.
Nitong Miyerkules, nasa 2,000 na lamang ang testing kits sa imbentaryo ng Department of Health kaya malaking tulong ang testing kits mula sa UP-NIH.
Nangako ang UP-NIH na makakapagprodyus ng 1,000 hanggang 2,000 testing kits ng tuluy-tuloy kada linggo makaraang aprubahan ito ng FDA.
Mag-uumpisa na ng produksyon ang laboratoryo ng UP-NIH at Philippine General Hospital sa darating na Lunes.
Nanawagan rin si Domingo sa publiko na huwag bibili ng testing kits sa mga hindi otorisadong seller. Tanging mga mapagkakatiwalaan na laboratoryo lamang ang maaaring makaprodyus nito, dagdag niya.
- Latest