Vaccine vs COVID-19, dapat aprub ng WHO, FDA bago gamitin sa Pinas
MANILA, Philippines — Dapat munang aprubahan ng World Health Organization (WHO) at Food and Drug Administration (FDA) ang anti-viral drug na una nang pinayagan ng China na gamiting panlaban sa 2019 coronavirus disease (COVID-19) bago payagang maipamahagi sa Pilipinas.
Nauna rito, inaprubahan na ng China ang produksiyon at pagbebenta ng Favilavir, kasunod nang pagpalo na sa mahigit 70,000 ang bilang ng kanilang mamamayan na dinapuan ng virus habang umakyat na rin sa mahigit 1,800 ang nasawi at karamihan sa mga ito ay mula sa mainland China.
Paliwanag ni Health Assistant Secretary Maria Rosario Vergeire na bago tuluyang makapasok at maipagbili sa Pilipinas ay kailangan muna ng naturang gamot na dumaan sa proseso, maaprubahan ng WHO at FDA at pumasa sa ipinatutupad na standards ng mga ito.
Ayon pa sa opisyal, maging ang plasma therapy na ginagamit ng ilang doktor sa China upang lunasan ang kanilang mga pasyente na may COVID-19 ay dapat din munang aprubado ng mga medical authorities.
Sa Pilipinas, nakapagtala na ang DOH ng tatlong kumpirmadong kaso ng COVID-19, na pawang Chinese na mula sa Wuhan City, na pinagmulan ng virus.
Isa sa kanila ang binawian ng buhay habang ang dalawa pa ay nakarekober na at nakauwi ng China.
- Latest