Bidding sa Kaliwa Dam nasilip ng COA

MANILA, Philippines — Kinuwestyon ng Commission on Audit (COA) ang paggagawad ng kontrata para sa konstruksiyon ng P12.2-billion Kaliwa Dam project sa Infanta, Quezon sa isang Chinese firm.

Sa 8-pahinang audit observation memo, sinabi ng COA na nabigo ang technical working group (TWG) ng Metropolitan Waterworks and Sewerage System (MWSS) na makapagsagawa ng nararapat na bidding at vetting procedures bago nito iginawad ang proyekto sa China Energy Engineering Corp. (CEEC) noong December 2018. 

Ayon kina officer-in-charge audit team leader Rency Meryl Marquez at officer-in-charge supervising auditor Ma. Nancy Uy sa kanilang memo kay MWSS administrator Reynaldo Velasco, lumabas na nagsagawa ng shortlist ang TWG ng MWSS at kalaunan ay tinanggap ang bid applications ng tatlong Chinese firms – CEEC, Consortium of Guangdong Foreign Construction at Power China Ltd. – bagama’t dalawa sa mga ito ay hindi nakatugon sa pre-qualification requirements ng MWSS para sa proyekto.

Ayon sa COA, nabigo ang CEEC at ang Consortium of Guangdong na ipakita na nakasunod sila sa years of experience sa design at engineering works, gayundin sa construction works tulad ng itinatakda para sa proyekto.

Ang mas masama, ayon sa COA, ay ang sinasabing competitive bidding na isinagawa ng TWG ay tila moro-moro lamang.

Ang Consortium of Guangdong ay na-disqualify sa first stage ng bidding procedure dahil sa kawalan ng mga dokumento tulad ng business permit, Philippine Contractors Accreditation Board (PCAB) license, Philippine Government Electronic Procurement System (PhilGEPS) certificate at valid Single Largest Completed Contract o SLCC.

Na-disqualify naman ang Power China Ltd. sa second stage ng bidding nang mag-alok ito ng mas mataas ng 6.91 percent sa Approved Budget for Contract (ABC) gayung nauna nang inabisuhan na ang anumang bid na mas mataas sa ABC ay awtomatikong mababasura sa bid opening.