Pinay sa Dubai hindi nCoV ang ikinamatay ngunit pulmonya

MANILA, Philippines — Inilinaw ng government-run media ng United Arab Emirates na hindi namatay dahil sa Novel Coronavirus Acute Respiratory Disease (2019-nCoV ARD) ang overseas Filipino worker na naibalitang nasawi sa Dubai.

Una nang ibinalitang sinabi ni Labor Secretary Silvestre Bello III na namatay sa hindi pa nalalamang strain ng coronavirus ang Filipina.

"Ang kamatayan niya ay dulot ng pulmonya at nagnegatibo ang babae sa novel coronavirus," sabi ng Dubai Media Office sa Twitter sa Inggles.

.@DXBMediaOffice denies false statements attributed to the Philippine Labour Secretary regarding a Filipina dying in Dubai due to the coronavirus. The cause of death was pneumonia and the woman had tested negative for novel coronavirus.

— Dubai Media Office (@DXBMediaOffice) February 6, 2020

Sinasabing tubong General Santos City ang 58-anyos na babae, na 28 taon nang nagtratrabaho sa Gitnang Silangan.

Inaasikaso na ang pagpunta ng anak ng yumaong Pinay patungong Dubai upang maiuwi ang labi ng kanyang ina.

Isa ang UAE sa mga bansang may mga kumpirmadong kaso ng 2019-nCoV ARD at Middle East respiratory syndrome coronavirus (MERS-CoV), na parehong nakamamatay at kumalat na sa iba't ibang bansa.

Matatandaang naiulat ng Gulf News na wala pang namamatay bunga ng 2019-nCoV ARD sa kanilang bansa.

Mahigit-kumulang 630 na ang namamatay sa 2019-nCoV ARD matapos maitala ang 69 panibagong kaso ng fatalities sa probinsya ng Hubei sa Tsina, na pinagmulan ng sakit.

Nasa 2,447 kaso ng nCoV din ang naidagdag sa nasabing lugar, ayon sa health commission ng probinsya. — James Relativo

Related Stories

58-anyos na Pinay sa Dubai 'patay sa coronavirus,' sabi ng DOLE