Solon: Tulong muna bago mag-imbestiga

MANILA, Philippines — Dapat na tulungan muna ng Kongreso ang mga sinalanta ng pagsabog ng Bulkang Taal bago ang imbestigasyon sa sinumang nagpabaya diumano sa pagbibigay ng babala tungkol sa naturang pagsabog.

Sa kanyang ‘Aide Memoire’ kina House Speaker Alan Peter Cayetano at Majority Leader Martin G. Romualdez, inamuki ni Albay Representative at House Ways and Means Committee chairman Joey Sarte Salceda ang mga kapwa niya mambabatas na tugunan muna ang mga pangangailangan ng mga nasalanta kaysa panukalang imbestigahan ang Philippine Institute of Volcanology and Seismology dahil diumano sa atrasadong babala nito kaugnay sa pagputok ng bulkan.

“May natatanging kakayanan ang Kamara na tumulong sa pangangalap ng ayuda para sa mga sinalanta. Maaaring gamitin ng mga mambabatas ang kanilang mga Congressional district offices bilang tipunan ng mga ayuda mula sa publiko at pagbibigay kaalaman at tulong sa mga biktima ng kalamidad,” paliwanag ni Salceda.