Ex-congressman, 2 pa pinatay, sinunog sa kotse
MANILA, Philippines – Pinagbabaril saka sinunog ang dating congressman ng Batangas, kanyang bodyguard at driver sa loob ng isang kotse sa Tiaong, Quezon kahapon.
Sa ulat ni CALABARZON Police Director Police Brig. Gen. Vicente Danao, kinilala ang mga biktima na si dating Batangas 2nd District Rep. Edgar Mendoza, 60, driver nitong si Ruel Ruiz at bodyguard na si Nicanor Mendoza.
Bandang ala-1:45 ng madaling araw nitong Enero 9 ng makatanggap ng tawag sa telepono ang Tiaong Municipal Police Station (MPS) mula sa isang concerned citizen hinggil sa isang nasusunog na sasakyan sa San Francisco Bridge, Brgy. San Francisco ng bayang ito.
Mabilis nagresponde ang mga operatiba ng Tiaong MPS kasama ang mga elemento ng Bureau of Fire Protection (BFP).
Nabatid kay Quezon Provincial Police Office (PPO) Director Col. Audie Madrideo, dakong alas-12:30 ng madaling araw nang maalimpungatan ang ilang residente malapit sa tulay nang makitang nasusunog ang isang behikulo.
Nang maapula ang apoy ay dito nadiskubre ang bangkay ng dating solon at dalawa pa na kapwa may mga tama ng bala sa iba’t-ibang bahagi ng katawan.
Bandang alas-2:28 ng umaga nang tuluyang maapula ng mga bumbero ang apoy.
Sa pahayag ng pamilya ni Mendoza, ang dating mambabatas ay umalis sa kanilang tahanan sa Batangas City kasama ang kaniyang driver at isang bodyguard para dumalo sa isang pagpupulong sa Calamba City, Laguna noong Miyerkules ng tanghali.
Gayunman, nabigong makauwi ng kanilang tahanan ang dating kongresista na hindi rin makontak sa cellphone hanggang sa madiskubre ang krimen.
Kinumpirma naman ni Atty. Edgar Mendoza Jr., anak ng dating mambabatas na sa kanila ang sinunog na Honda Civic (DAN 6374 ).
Sinabi naman ni Major Lawrence Panganiban, hepe ng Tiaong Police, na kailangan munang maisailalim sa DNA test ang bangkay ng mga biktima para makumpirmang ito nga ang dating Kongresista at dalawang iba pa.
“Beyond recognition yung mga bodies, nagtataka nga tayo bakit nasa likod lahat ng vehicle yung tatlo, kelangan ng DNA to validate na sila nga ang mga narekober.
Patuloy ang masusing imbestigasyon sa posibleng motibo sa pagpatay sa dating solon at mga kasama nito.
Kaugnay nito, kinondena ng Malacañang ang pagpaslang at pagsunog sa sasakyan ni Mendoza.
“This is an outrageous act of barbarism. The perpetrators of this heinous crime will be pursued till they are placed behind bars. We assure the bereaved family of the deceased that justice will be accorded by prosecuting the people behind this dastardly crime to the fullest extent of the law,” ayon kay Presidential Spokesman Salvador Panelo.
“As the Palace condemns this recent felony, we express our deep condolences to the family, loved ones, colleagues and constituents of the late former Congressman Edgar Mendoza,” dagdag ni Panelo.
- Latest