Rep. Velasco ok sa drug war ni Duterte
MANILA, Philippines — Ipinagtanggol ni Marinduque Rep. Lord Allan Velasco ang anti-drug campaign ng Duterte Administration sa harap ng pagbatikos dito ni Vice President Leni Robredo.
Ayon kay Velasco, 79% Pinoy ang satisfied sa anti-drug campaign batay na rin sa Social Weather Station(SWS) survey at mula nang ilunsad ito noong 2016 ay naging mas ligtas ang mga kalsada at mas nararamdaman ng mga Filipino ang sense of security.
Sa MIMAROPA (Oriental and Occidental Mindoro, Marinduque, Romblon and Palawan) region na kinabibilangan ng distrito ni Velasco ay bumaba na umano ang kaso ng illegal drugs.
Sa datos ng Philippine Drug Enforcement Agency (PDEA) ay 64% ng mga barangay sa Mimaropa ay naideklara nang drug-free.
Una nang naging kontrobersiyal ang Marinduque pagdating sa illegal drugs nang masakote ng PDEA at Marinduque PNP ang dating staff at driver ni Velasco na si Mark Dexter Anthony Preclaro matapos umanong mahulihan ng 18 gramo ng shabu at mga armas.
Samantala ang ama ni Velasco na si retired SC Justice Presbitero Velasco ay una na ring isinangkot ni Sen. Leila de Lima na may koneksyon umano sa convicted drug lord na si German Agojo.
Si Agojo ay isa sa mga inmates ng New Bilibid Prison na tumestigo laban kay De Lima habang si Justice Velasco ang nagponente ng desisyon sa kaso ng senadora na nagbigay daan para makulong ito.
- Latest