2 batalyong sundalo ipapadala sa Middle East
MANILA, Philippines — Dalawang batalyon o 1,000 combat troops ng Armed Forces of the Philippines (AFP) ang ipadadala ng pamahalaan sa Middle East para sa paglilikas sa mga OFWs upang maiwasang maipit ang mga ito sa sigalot sa pagitan ng Iran at ng Estados Unidos.
“Sabi ni Presidente one Army and one Marine Battalion... Pinagpe-prepare niya dalawang battalion,” pahayag ni Defense Sec. Delfin Lorenzana.
Nilinaw naman ni Lorenzana, chairman ng binuong Special Committee sa paglilikas ng mga OFWs sa Iran, Iraq at Lebanon na ang dalawang batalyon ng mga sundalo ay upang mabigyang proteksyon lamang ang mga Pinoy doon at hindi para isabak ang mga ito sa combat operations.
Sinabi ni Lorenzana na gagamit ang AFP ng air at naval assets habang ikinokonsidera na rin ang pagrenta ng cruise ship at commercial plane kung maraming OFW doon ang nais nang umuwi sa bansa.
Samantala, tutungo ngayon sa Iraq si Environment Secretary Roy Cimatu, Phl envoy to the Middle East, upang pangunahan ang paglilikas sa mga Pinoy sa Iraq at Iran.
Batay sa pakipag-usap niya sa mga ambassador sa dalawang bansa, may halos 1,600 Pinoy ang handa nang ilikas mula sa Iraq.
Sa ulat ng DOLE, may 35,000 OFWs sa dalawang bansa.
Anya, Baghdad airport ang isang dadaanan ng mga Pinoy para bumalik sa Pilipinas pero kung sarado ito, kukuha sila ng mga shuttle bus para dumaan by land papuntang Jordan, saka tutungo ng Dubai puntang Maynila.
Ang Dubai ang magsisilbing center country ng Pilipinas para maibalik ang mga Pinoy galing Iraq pa-Maynila.
Bukod sa Amman, Jordan maaari ring daanan ang Tel Aviv, Israel puntang Dubai to Manila o Qatar to Manila.
Gagawan din anya ng paraan ni Cimatu na mabigyan ng kaukulang papeles ang mga ililikas na Pinoy sakaling wala pa ang mga itong makuhang visa.
- Latest
