Forced evacuation sa Iraq ikinasa
MANILA, Philippines — Pinayuhan na ang mga Pilipino sa Iraq na magsilikas dahil itinaas na ng embahada ng Pilipinas sa naturang bansa ang Alert Level 4 na pinakamataas na crisis status.
Kinumpirma ni Department of Foreign Affairs Assistant Secretary Ed Meñez na itinaas na ang alert level sa Iraq bilang resulta ng mga coordination meeting ng pamahalaan hinggil sa sitwasyon sa Middle East.
Ang Alert Level 4 na nananawagan sa evacuation o mandatory repatriation ay ipinapalabas kapag merong large-scale internal conflict o “full-blown external attack.”
Sa live video sa Facebook page ng Philippine Embassy sa Iraq, ipinahayag ni Chargé d’Affaires Jomar Sadie na inutos na ni Pangulong Rodrigo Duterte sa iba’t ibang ahensiya ng pamahalaan na ipatupad ang paglilikas ng mga Pilipino sa naturang bansa kasunod ng tension dito at ng United States.
Idiniin ni Sadie na ang utos sa kanila ay magsagawa ng mandatory repatriation.
Sa datos ng Philippine Embassy, merong 450 undocumented at 1,190 documented na mga Pilipino sa Iraq. Mahigit sa kalahati rito ay nakabase sa Kurdistan region habang ang 847 ay nakabase sa Baghdad area.
Sinabi ni Meñez na marami sa mga Pilipino sa Baghdad ay nagtatrabaho sa US at iba pang mga foreign facilities.
Ipinalabas ang Alert Level 4 nang bombahin ng Iran ang Al-Asad airbase sa Iraq kung saan nagkakampo ang mga sundalong Amerikano.
Sinabi ng Iranian news agency Mehr na tinarget ng Islamic Revolutionary Guard Corps ng Iran ang base. Ipinangako ng Tehran na gaganti ito sa pagpatay ng US sa kanilang heneral na si Qassem Soleimani.
- Latest
