Duterte nadismaya sa ninja cops
Kaya wala pang itinatalagang PNP chief
MANILA, Philippines — Labis umano ang pagkadismaya ni Pangulong Rodrigo Duterte sa kontrobersyal na isyu ng ninja cops na gumulantang sa sambayanan kaya hindi pa siya nagtatalaga ng bagong hepe ng Philippine National Police.
Ito ang inamin kahapon ni Department of Interior and Local Government Secretary Eduardo Año na inatasan ng Pangulo na pangasiwaan muna pansamantala ang PNP dahilan wala pa itong mapili sa hanay ng mga contenders para humawak ng posisyon bilang top cop ng bansa.
Isa anya itong dahilan kaya natatagalang magpasya ang Pangulo. “Talagang nadismaya siya sa nangyari na iyon kasi sabi nga ng Pangulo, ibigay na niya ang lahat sa PNP kabilang ang dobleng sahod ng mga pulis pero meron pa ring gumagawa ng ganito,” sabi ni Año sa PNP Press Corps.
Sinabi ni Año, muling sinabi sa kaniya ni Pangulong Duterte na kahit maubos ang buong kapulisan basta mayroong sangkot sa droga ay tanggalin sa serbisyo.
Sa kabila nito, sinabi ni Año na nakikita naman niya ang determinasyon ng liderato ng PNP na matugunan ang mga inaasahan ng punong ehekutibo sa organisasyon.
Magugunita na nakaladkad ang pangalan ni dating PNP Chief ret. Police Gen. Oscar Albayalde sa ninja cops matapos na masangkot ang mga dati nitong tauhan sa Pampanga sa pagre-recycle ng droga noong Nobyembre 2013.
- Latest