Mayorya ng Pinoy pabor alisin na ang martial law sa Mindanao
MANILA, Philippines — Mayorya ng mga Pilipino ang naniniwalang dapat nang matapos sa hulihan ng taong 2019 ang martial law sa Mindanao, ayon sa isang bagong survey ng Social Weather Stations.
Sa 1,200 adult na sinaklaw ng survey, 65% ang nagsabing hindi na dapat palawigin ang martial law sa Mindanao nang lagpas pa sa December 31 deadline nito. May 34% lang ang naniniwalang dapat itong palawigin pa sa mas mahabang panahon habang 1% ang walang sagot.
Binanggit ng SWS na ang proportion ng mga nananawagang tapusin na ang martial law sa Mindanao sa pagwawakas ng taon ay mataas sa lahat ng lugar: 67% sa Metro Manila, 67% sa Visayas, 66% sa Balance Luzon at 61% sa Mindanao.
Nasa ilalim ng martial law ang Mindanao mula noong Mayo 2017 kasunod ng isang enkuwentro ng mga tropa ng pamahalaan at ng Maute terror group sa Marawi City.
Ang survey ay isinagawa noong Disyembre 13-16.
- Latest
