Taas presyo sa diesel, kerosene nagbabadya
MANILA, Philippines — Nagbabadya na naman na magmahal ang presyo ng mga produktong petrolyo partikular ang diesel at kerosene ngayong darating na linggo.
Sa pagtataya ng mga oil industry experts, inaasahan na tumaas ang diesel mula P1.10 hanggang P1.20 kada litro habang ang kerosene ay P1 hanggang P1.10 kada litro.
Maaari namang walang maganap na paggalaw sa gasolina o mabawasan ng bahagya sa halagang P.10 sentimos kada litro.
Paliwanag ng mga taga-industriya, tumaas ang demand o pangangailangan sa diesel kumpara sa gasolina kasunod ng kasunduan ng China at US.
Matatapat ang naturang pagtataas sa Martes ng umaga na bisperas ng Pasko.
Samantala, pansamantalang mawawalan ng kuryente sa ilang lugar sa Metro Manila, Cavite at Bulacan ngayong darating na linggo dahil sa ginagawang maintenance work ng Manila Electric Company (Meralco).
Sa kabila nito, tiniyak ng Meralco na walang magaganap na ‘power interruptions’ sa lahat ng kanilang mga kustomer sa Disyembre 24 at sa mismong araw ng Pasko sa Disyembre 25.
Kabilang sa mga apektadong lugar ang Pasong Tamo, Quezon City (Disyembre 23), Malolos City, Bulacan (Disyembre 27-28), Dasmariñas at General Trias City, Cavite (Disyembre 28-29), Bocaue, Bulacan (Disyembre 29).
- Latest
