Yaman ng mga Ampatuan hahabulin
MANILA, Philippines — Isang araw matapos mapatawan ng Reclusion Perpertua, plano naman ng mga abogado ng mga naging biktima ng Maguindanao massacre na habulin ang mga ari-arian ng pamilya Ampatuan at maibigay sa mga pamilya ng biktima.
Lima sa pitong miyembro ng pamilya Ampatuan na kinabibilangan nina dating Datu Unsay Mayor Andal Ampatuan Jr., dating Autonomous Region in Muslim Mindanao governor Zaldy Ampatuan, Anwar Ampatuan Sr., Anwar “Ipi” Ampatuan Jr., at Anwar Sajid “Ulo” Ampatuan ang nasentensiyahan ni Quezon City Regional Trial Court Judge Jocelyn Solis-Reyes sa 57 counts ng kasong murder.
Ayon kay Atty. Harry Roque, isa sa mga legal counsel, aalamin nila ang mga pagmamay-ari ng mga Ampatuan at hihilingin sa korte na i-freeze ang naturang mga ari-arian ng mga Ampatuan kung kinakailangan at maibigay sa mga pamilya ng mga namatay.
Nakasaad sa desisyon ng korte na ang bawat isang biktima ay dapat na tumanggap ng P1 milyon bilang danyos.
Bagamat walang katumbas na halaga ang buhay ng mga namatay, naniniwala si Roque na sapat ang halaga para sa mga pamilya ng karumal-dumal na krimen.
Matatandaang nagsampa ng forfeiture case ang Ombudsman laban kay dating Maguindanao governor Andal Ampatuan Sr. dahil sa unexplained assets na umaabot sa P54.966 milyon. Namatay si Andal Sr. noong 2015.
Lumilitaw na si Andal Sr. ay nagmamay-ari ng 19 real estate properties, 35 motor vehicles na umaabot sa P45.7 million at 23 undeclared firearms na nagkakahalaga ng P3.838 milyon.
- Latest