Iba pang utility firms sisilipin
MANILA, Philippines — Matapos sumingaw kamakailan ang maanomalyang kontrata ng gobyerno sa dalawang water concessionaires, sisilipin na rin ni ACT-CIS Cong. Eric Yap ang ibang operasyon ng mga utility companies.
Ayon kay Cong. Yap, “Gusto nating malaman kung tama ang singil ng telepono at kuryente sa mga konsyumer hindi lang dito sa NCR (National Capital Region) kundi pati sa mga probinsiya rin”.
Sinabi ni Cong. Yap, nais niya lang masiguro ang proteksyon ng mga tao laban sa mapang-abusong mga kumpanya.
“Dapat pinapagaan ng mga kumpanyang ito ang buhay ng mga tao dahil negosyo nila ay tubig, kuryente, at komunikasyon,” ayon pa sa mambabatas.
Paliwanag niya, may mga natatanggap na raw siya na reklamo hinggil sa walang kuwentang serbisyo ng ilang utility companies pero pagdating sa singilan mabilis at maagap daw.
Hinihikayat niya rin ang mga mamamayan na kung may reklamo laban sa mga utility companies sa kanilang lugar na magsumbong sa mga kinauukulan para maaksyunan ang problema nila.
- Latest