Duterte nagbanta ng military takeover vs water firms

MANILA, Philippines — Nagbanta ng military takeover si Pangulong Rodrigo Duterte upang patakbuhin ang Maynilad at Manila Water matapos batikusin nito ang pinasok na concession agreement ng gobyerno sa 2 water firms.

Ginawa ng Pangulo ang banta sa mensahe nito sa birthday celebration ni former Senate President Manny Villar sa Las Piñas City kamakalawa ng gab.

“Last night I was talking to the PSG, sinabi ko sa kanila huwag mo akong laruan na takot takutin ninyo ako, sige magsibat kami, bahala wala kayong tubig,” wika ng Pangulo.

Aniya, kapag hindi siya nakuntento sa paliwanag ng Maynilad at Manila Water ay iuutos niya ang takeover dito.

“I will order the Armed Forces to operate. Sige sundalo, takeover kayo,” dagdag ng Pangulo.

Nagbanta din ng warrantless arrest ang Pa­ngulo sa mga taong sangkot sa nasabing concession agreement dahil sa economic sabotage sanhi ng onerous contract na pinasok ng mga ito.

“‘Pag niloko mo ako, niloko mo [ang] Pilipino. I will suspend the [privilege of the] writ of habeas corpus and I will arrest all of you,” dagdag  ng Pangulo.

“Talk to General Salamat. Mag-usap kayo diyan. Ako? I will just prepare the charges. ‘Pag hindi tayo nagkaintindihan dito, economic plunder,” sabi pa ng Pangulong Duterte.

Lumiham na sa Pa­ngulo ang 2 water firms kung saan nag-alok ng renegotia­tion sa kontrata.

Anila, hindi na rin nila sisingilin ang gobyerno ng P11 bilyon na napanalunan nila sa korte sa Singapore kasabay ang pangako na hindi rin magpapatupad ng rate increase sa susunod na taon.

Pero ng kinansela ng Metropolitan Waterworks and Sewerage System ang extension ng contract hanggang 2037 ay biglang nagbanta ng 100 percent na water rate increase ang 2 water firms.

“These concessionaires can do their worst and continue with fleecing the consumers while the President will do his best in serving and protecting the interest of the people,” ayon naman kay Presidential Spokesman Salvador Panelo.