Water jeepneys, aarangkada ngayon
Biyaheng Cavite-Manila
MANILA, Philippines — Aarangkada na ngayong araw ang biyahe ng water jeepney, ayon sa Department of Transportation (DOTr).
Isang buwan muna na magbibigay ng libreng sakay ang water jeepney bilang pamaskong handog ng DOTr, MARINA, PCG, PPA at lokal na pamahalaan ng Cavite, sa publiko.
Inilunsad ng DOTr-Marina ang naturang jeepneys upang mapaikli ang biyahe mula Cavite hanggang Maynila at pabalik na mula sa dating 3-4 oras, ay maging 15-20 minuto na lamang.
Kabilang sa magiging ruta nito ay Cavite City Port Terminal-Cavite City Hall patungong CCP Port gayundin sa Liwasang Bonifacio at pabalik.
Kumpiyansa si DOTr Secretary Arthur Tugade na makatutulong ang pagbubukas ng naturang ferry boat service sa pagpapaluwag ng daloy ng trapiko sa Metro Manila dahil magkakaroon na ang publiko ng opsyon para sa water transportation.
Ang pamasahe mula CCP hanggang Cavite at pabalik ay nasa P200, P160 sa estudyante, P143 kapag senior citizen at P125 kapag bata na nasa edad apat hanggang 11-taong gulang.
Ang ruta naman na Cavite to Lawton at pabalik ay P160 ang pamasahe, P128 kapag estudyante, P114 kapag senior citizen at P80 kapag bata na edad 4-11.
- Latest
