Sara kinatigan ng Palasyo sa ‘Manila’
MANILA, Philippines — Kinatigan kahapon ng Malacañang ang naging pahayag ni Davao City Mayor Sara Duterte na dapat ang piniling kanta sa SEA Games opening ceremony ay hindi “Manila”.
Ayon kay Presidential Spokesman Salvador Panelo, dapat ang piniling kanta ay ang sisimbolo sa buong bansa at hindi lamang sa Manila.
Binatikos ni Mayor Inday ang organizer ng SEA Games dahil sa piniling kanta nito na hindi naman kumakatawan sa buong bansa.
“Tama si Mayor Sara. We need to have a song that will reflect not only Manila but the entire Philippines. Wala pa eh,” wika ni Panelo kahapon sa media briefing.
“It seems that Manila was used because that is the most popular song in relation to the Filipinos,” dagdag pa nito.
Ang kantang ‘Manila’ ay sumikat noong 1970 at kinanta ng bandang Hotdog.
Ito ang pinili ng organizer na kanta sa pagpasok ng mga atletang Pinoy sa opening ceremony sa Philippine Arena kung saan ay napaindak pati si Pangulong Rodrigo Duterte.
“Kinakatawan ng kantang iyon ang Maynila bilang kapitolyo ng Pilipinas. Kapag meron tayong wini-‘welcome’ sa Maynila, ibig sabihin, wini-‘welcome’ mo ang lahat sa Pilipinas,” paliwanag ng PHISGOC.
- Latest
