Cellphone bawal na sa korte

MANILA, Philippines — Ipinagbawal ni Supreme Court  Chief Justice Diosdado M. Peralta ang paggamit ng mobile phones at iba pang gadgets sa mga pagdinig sa lahat ng korte sa bansa.

“Para panatilihin ang maayos na pagdinig at paglilitis, at para sa mahusay na interes ng serbisyo, mahigpit nang ipinagbabawal ang paggamit ng cellular o smartphone habang nasa loob ng korte,” sabi ni Peralta sa Memorandum Order No.74-2019 na petsang November 4.

Ayon kay Peralta, kailangan na mapanatili ang kaayusan ng pagdinig sa mga korte sa bansa.

Aniya kung hindi rin lamang kailangan sa proceedings  mas makabubuti  huwag gamitin o buksan sa loob ng korte.

Bahagi ito ng pagmo-monitor ng performance ng lahat ng korte. 

Kasama rin ito sa 10-point program ni Peralta bilang Chief Justice.