Murang gamot suportado ni Go
Sa expanded MDRP coverage
MANILA, Philippines – Nagpahayag ng suporta si Sen. Bong Go sa panukalang pagpapalawak sa Maximum Drug Retail Prices (MDRP) list upang matiyak na makabibili ng mas murang gamot ang taumbayan.
Pagkaraan ng privilege speech ni Sen. Risa Hontiveros sa naturang usapin, sinabi ni Go na sinusuportahan niya ang expansion ng MDRP para matiyak na makakabili ng murang gamot ang mga mamamayang Pilipino. Idiniin niya na ang healthcare ay isang karapatan, hindi commodity.
Kapwa sinabi nina Go at Hontiveros na dapat matalakay ang naturang isyu sa pamamagitan ng mga probisyon sa Cheaper Medicines Act of 2008 na nagbibigay ng kapangyarihan sa Pangulo ng Pilipinas na magpataw ng maximum retail prices sa mga ibinebentang gamot sa bansa, base sa rekomendasyon ng kalihim ng Department of Health (DOH).
Ani Go, personal niya itong tatalakayin kay Pangulong Duterte.
Sinabi ni Hontiveros na sa pinakahuling Philippine National Health Accounts, lumilitaw na 41 porsiyento ng healthcare spending sa bansa ay sa pagbili ng pharmaceutical products o medicines.
Pinuna ni Go na, batay sa datos ng 2018 Medical Trends Around the World Report ng Mercer Marsh, masyadong mahal ang mga gamot sa Pilipinas kumpara sa ibang bansa at maging ang mga generic drug prices ay apat na ulit na mas mataas kaysa sa international reference prices.
- Latest