5-day calamity leave isinulong
MANILA, Philippines – Bilang tulong sa mga empleyado na magiging biktima ng kalamidad, isinulong ni Sen. Leila de Lima ang panukalang bigyan sila ng limang araw na special emergency leave.
Sa Senate Bill 1123 na tatawaging Calamity Leave Law, sinabi ni de Lima na dapat maprotektahan ng mga manggagawa sa pampubliko at pribadong sektor hindi lamang ang kanilang sarili kundi ang kanilang pamilya at ari-arian lalo na tuwing may kalamidad.
Ipinunto ni de Lima na ang Pilipinas ay nasa Pacific Belt at dinadaanan ng nasa 20 bagyo taun-taon.
Sa ilalim ng panukala, ang limang araw na special emergency leave ay ibibigay pagkatapos ideklara ang state of calamity ng Pangulo ng bansa o ng Lokal na Sanggunian alinsunod sa Section 16 of R.A. No. 10121.
Maari ring mag-avail ng calamity leave ang mga manggagawang na-stranded sa mga naapektuhang lugar; mga nagkaroon ng sakit dulot ng pagtama ng kalamidad; mga mag-aalaga ng pamilya at iyong mga nangangailangan ng agarang pagsasaayos at paglinis na nasira nilang bahay.
- Latest
